Gaya ng lagi kong sinasabi, eksperimental ang 2012 para sa akin. Ito ang taon kung kailan kumawala ako sa personal kong kahon-- isang pagrerebelde para sa ikauunlad ng aking sarili.
Maraming taong dumating sa taong ito: Ang iba ay literal na dumaan, ang iba ay tumambay, ngunit marami ang nagtagal. Maraming sumalo sa eksperimento. Marami rin ang nagpasalo. Kaya't ngayon ay pasasalamatan ko ang ilang mga tao na labis ang naiambag sa paglago ko para sa taong ito.
Sobrang salamat, Camille, dahil nagkaroon ako ng kaibigan na kagaya mo. Sa'yo ko natutunan kung paano maging rational at prudent. Ikaw yung nagturo sa akin ng maturity, at ikaw ang nagmulat sa akin sa totoong mundo. Salamat kasi kahit noong bata pa ako, nagtiwala ka na sa kakayahan ko. Salamat kasi ikaw yung kauna-unahang tao na nagsabi sa akin na madami akong kayang gawin. Kung wala ka, hindi ko alam kung ano ako ngayon. Salamat! Mahal kita at si Mandy!
